El Cuquiellu

El cuquiellu ye un paxiaru míticu n´Asturies. En su alreedor entamáronse un montón de cuentos, hestories y refranes, que nun hay cuenta acabalos. Si dispués de leer estes línies, apetézsete escuchalu, voy descubrite un sitiu desd´el que pues facelo y quedar satisfechu del día que pasaste. Aconséjote que lo fagas un día de primavera de los de verdá, un día d´esos que ta espejau y tien muncha claridá, por si tienes suerte y pues contemplalu. El llugar idóneu ye la “Campa les Abeyes”.

Llegar hasta aquí ye muy fácil, nun tienes más que tomar la carretera de Figaredo a Urbiés que atraviesa el Valle de Turón, y una vez aquí siguir en direción a Ciañu, 6 kilómetros per enriba d´Urbies y dexia´l coche en el Altu la Falla tras andar 21 Kilómetros desde Figaredo. Ta to indicao, nun hay pérdida. Una vez que te apees del coche tienes que dir caminando per una pista llana de 2 kilómetros y al final de ella descubres allí la Campa les Abeyes. Contémplase desde ella el valle de San Justo - Armiello y y´el terreno abonau p´al cuquiellu, pues ye n´onde ta mas agusto la mayor part´el día. Si nun lu escuches desde la campera, tes que dir baxiando hasta el pueblín de San Justo. Nun te preocupe pues sólo hay kilómetro y mediu y de pasu bebes agua na Fuente “la preñá” o na de San Xusto y recreeste contemplando esti pueblu, exemplu típicu de lo que ye una aldea asturiana de va un montón de años.

Ye un paxiaru muy cuco, dizlo to el nome. Siénteslu cantar pel monte, col su sonoru “Cu-Cu”, y quédeste aleleau escuchándolu y per más que t´esfuerces en querer velu, faisete emposible, pues contrólate, calla, y nun dexa que lu vean. Como narices va dexar que lu vean si ye un delincuente continuamente metíu n´el mundu del pillaje. Tira los güevos de los demás paxarinos y cuando atopa un nial, ya ta entamá, ponse a cantar con tal algarabía que da la impresión que i tocó la lotería. Pa poder contemplar esti actu de pillaje tienes que madrugar, pues el failo per la mañana, cuando ta amaneciendo y el dueñu´l nidu sal per primera vez n´el día.

Pero nun ye sólo que yos tire los güevinos, ye que enriba, el muy vagu, pon allí los suyos pa que i los crien y saquen arriba los demás, por eso se diz que nunca anida. Del que más abusa ye del raitán. La raitanina nun se entera que i cambiaron los güevos y que los que está empollando son de otru. Prubina cuando vea nacer los polluelos y vea que i sal algún prietu, ¡vaya desilusión!. Y pa más el polluelu del Cucu, ye mayor que los demás y pa asegurase la comida que trai la raitanina, tira a los sos fillinos del nial. Y pa más entobía como ye tan grande el polluelu del Cuquiellu, la pobre raitanina termina arrebentá de tanto acarriar tanta comida como i pide. La naturaleza dotolu de les armes necesaries pa dedicase al pillaje, pues les plumes grises acenizaes, faenlu poco visible entre les rames de los áboles y permitei que la raitanina ande confía, pues nun ye capaz de velu.

Ye un paxiaru de pasu, apaezse per aquí en cuanto escomencipia la primavera, y cuando ésta quier dexanos, va col cuento a otra parte. Fuera esta época nun pues escuchalu, aunque sí pues date a confusión, pues hay unu, el paxairu l´agua, que ta aquí tol añu y tien un cantar paeciu al suyu. Por lo que se refier a su llegada dizse:

El cuco, el ruco y el palpayar, el día de Santa Ana pasaron la mar, o como dicen en otres partes Na primavera tres bichos pasen la mar: la rola, el cuco y el parpayal.

Pero si pasan los diis y nun se lu oye anunciar su visita, dizse entonces que tien problemas. Por eso el dicho reza:

Si entre el cinco y el diez de Abril, nun he vuelto, ye que me hallo enfermu, me he muerto o, al Rey estoy sirviendo. En otres partes dicenlo paecío Entre Marzo y Abril quedó´l cuco de venir; si en Abril no ha venido, o se ha muerto o se ha perdido.

Ye esperau por queríu y si no bien témese lo peor pues creese que Entre Marzo y Abril el cuquiellu ha de venir, si non bien, algo grave va a ocurrir. Ta claro que cuando más seguro ye que paezca, ye en el mes de Abril pues en Abril sal el cuco del cubil.

Nunca falta cuando llega la nevá el cuquiellu. Esta ye la última nevá del añu, y nun falla, baxia la nieve hasta onde baxió cantando el cuquiellu. Si él nun baxia hasta el Valle, la nieve quédase nos montes. Diz d´ello el refrán:

Cuquiellu marciellu, trae la ñeve tras el capiellu. Y ligao con ello dizse tamién Si el cuqiellu canta antes d´Abril, ta´l iviernu por venir.

Ta tan relacionau col tiempu que se comenta:

Si el cuquiellu vien per la sierra, fame na tierra.

La explicación ye clara, si bien per riba ye que ta buen tiempu y entrevese un añu de sequia duru, pero si entra per baxio, ye que el tiempu ta malu y va a llover y ñevar, con lo bueno que ye esto p´al campo na primavera.

Dizse tamién que cuando llega, cuando lu sientes cantar por primera vez n´el añu, ye muy importante traer perres contigo y tocales, pues si lu sientes y nun les traes y toques, vas tar esperrau tol añu, en sin una perra. Por eso Lolo el de San Justo, anque vaya a tresnar el ganao o a facer cualquier otra llabor, lleva perres con él anque nun i valgan pa na.

Pero nun pierdas cuidao, n´una zona del Valle de Turón, na Casillina, paez que tien utru comportamientu, por que hay una hestoria del llugar que diz: Cuando cante el cuquiellu, y´el tiempu de plantar les fabes. Da impresión de que aquí bien tardíu, porque les fabes plántense en mayo. Ensina mesmo pa Porceyo en Xixón dicen: ¿Canta´l cuquiellu? Agua pa´l maiz, porque dicen que cuando apaez el cuquiellu y canta ye el tiempu de semar el maiz.

Por lo que se refier a su marcha dizse d´el que : Per San Juan, marcha el cuquiellu y bien el tabán. Claro por esta época ya nun hay güevos que sisar y tien que dir a buscar encautos a otros llugares. El refrán fainos referencia a que en ésta época ya comienza´l calor y el puñeteru tabán empieza a facer de les suyes.

Ta ligau tamién a les mozes casaeres, pues dallos una pista, de cuando puen casase. Echar la cuenta pa sabelo ye muy fácil, faise contando del siguiente modu: Cuando una moza casaera lu siente cantar, al primer Cu-Cu que suelta ella diz Cuquiellín del rey; al segundu Cu-Cu diz paliquín d´escoba; al terceru cuantos años falten y al cuartu diz pa la mi boda. Desd´esti entonces cada Cu-Cu que esplaye, ye un añu que i falta pa casase. Probe mozina si el cuquillu tan cantarín el día que escoye pa saber cuando va a casase.

También se relaciona con los mozos que nun asienten cabeza y son uno pendencieros y dizse d´ellos que : Ye del parecer del cucu, paxaru que nunca anida, pon el güevu´n nido axenu y otru poaxiaru lu cria.

Otros imítenlu pa decir que ca ún fai lo que i da la gana con el dicho:

Cu – Cu
Tapa el Cu
Tápalu tú

Ye tan conocíu que hasta lu confundieron col fantasma. Un día d´estos de la Selmana Santa, n´aquellos tiempos en que se apaecía el fantasma, diben pa la mina Pin y Xuan. Diben charrando tan agusto, cuando al pasar al lau una cerezal grandona, sintieron un ruiu muy raru y nun devinieron en pensar mas que yera el fantasma. Escomencipiaron a correr como llocos, tal que paecíen esguiles asustaes. Pero pa disgracia d´ellos, venía venía a cuatro pasos Pepe el Feu y vió como salía el Cuquiellu d´entre les rames. Nun sabéis bien la murga que se entamó na mina esi día, quedaran arreglaos Xuan y Pin, que endesde entonces amotáronlos “ los fantasmas de la cerezal”.

Tamién ta concebiu como agorero y mortal, pues dizse:

Si el cuquiellu y la coruxa
Xiblen ena to quintana
Pierdes de xintar la gana
Y acabósete la xuxa

Hay un cantar muy popular y d´esos que presta entonar nes sidreríes o en los montes d´Asturies que nos fala algo d´el, al ligalu con los sos parientes i amigos. Diz así la tona:

Baxando un día pe l´aldea
Sentí un paxarín cantar
Detrás de casa Pericu
N´el picu la cerezal

Que paxarín será esi
Que canta en la cerezal
Que tien el picu amariellu
Esi que i llamen Cuquiellu
Y que siempre canta igual

Un poquitín mas abaxo
Sentí cantar el pinzón
Al veranín y al xilgueru
Y asi que i llamen gorrión
Que anda per baxo les teyes
Ye compañeru del ratón

Rosa n´onde ta Pericu
Ta detrás del payar
Cabruñando el guadañu
Pa mañana dir segar

Trabay to el verano
P´al invernu descansar
Y comer les fariñes
Sentau detrás del llar.

Pero nun va a ser malo to lo del cuquiellu, ye muy buenu pa la güerta y los árboles de nuestros bosques de fayes, castaños y robles, pues por suerte, come les larves la procesionaria, esa carrera de cien pies que esfarrapen to l´arbol que topen nel camín y con la que otros paxiaros nun se atreven, pues los pelucos que la rodeen fai que se yos atragante n´el garguilu, pero a él, como si na, como si toviera tomando agua. Además como ye un glotón, come los insectos de dos en dos, manteniendo l´aire limpiu de to estos bichos.

Nun yes honrau si nun faes honor a aquelles persones que te dan l´información pa poder contar estes coses. Nesti casu la verdadera artífice d´estes hestories del Cuquiellu, ye Generosa la de Lolo el de San Justo, l´unica vecina que vive allí y que ye un libru abiertu.

¡ Animo Generosa tenemos que siguir contando cosiquines ¡

 Marcelino Escudero García